భార్యతో గొడవపడి కొడుకును బంగ్లాదేశ్ బోర్డర్ లో వదిలేసిన తండ్రి

భార్యతో గొడవ పడిన ఓ వ్యక్తి కన్నకొడుకని కూడా చూడకుండా, పదేళ్ల బాలుడిని భారత్-బంగ్లాదేశ్ సరిహద్దులో వదిలిపెట్టి వెళ్లిపోయాడు. ఈ అమానవీయ ఘటన పశ్చిమ బెంగాల్‌లోని నార్త్ 24 పరగణాల జిల్లాలో చోటుచేసుకుంది. పోలీసులు తెలిపిన వివరాల ప్రకారం, ఈ సంఘటన మంగళవారం రాత్రి జరిగింది.

నార్త్ 24 పరగణాల జిల్లా, అశోక్‌నగర్ పోలీస్ స్టేషన్ పరిధిలోని కత్‌పోల్ ప్రాంతానికి చెందిన పింటూ ఘోష్, మాధవి ఘోష్ దంపతులకు పదేళ్ల కుమారుడు ఉన్నాడు. అయితే, వీరిద్దరి మధ్య తరచూ గొడవలు జరుగుతుండేవి. ఇటీవల గొడవ తీవ్రం కావడంతో, మాధవి తన కొడుకును అత్తగారింట్లో వదిలి పుట్టింటికి వెళ్లిపోయింది. మంగళవారం రాత్రి, పింటూ ఘోష్ తన కొడుకును తల్లి దగ్గర వదిలిపెట్టేందుకు అత్తగారింటికి వెళ్లాడు. అయితే, కొడుకును తన వద్ద ఉంచుకోవడానికి ఆమె నిరాకరించింది.

దీంతో తీవ్ర ఆగ్రహానికి గురైన పింటూ, కిరాతకమైన నిర్ణయం తీసుకున్నాడు. కొడుకు బట్టల బ్యాగుతో సహా బైక్‌పై ఎక్కించుకుని బసిర్‌హత్ ప్రాంతంలోని భారత్-బంగ్లాదేశ్ సరిహద్దుకు తీసుకెళ్లాడు. అక్కడ నిర్మానుష్య ప్రాంతంలో బాలుడిని బైక్‌పై నుంచి దించేసి, చీకట్లోకి వేగంగా వెళ్లిపోయాడు. ఆకస్మిక పరిణామానికి షాక్‌కు గురైన ఆ చిన్నారి, చలికి వణుకుతూ భయంతో ఏడవడం మొదలుపెట్టాడు.

బాలుడి ఏడుపు విన్న స్థానికులు వెంటనే అక్కడికి చేరుకుని, అతడిని ఓదార్చి ఆహారం అందించారు. అనంతరం బసిర్‌హత్ పోలీసులకు సమాచారం ఇచ్చారు. పోలీసులు చిన్నారిని పోలీస్ స్టేషన్‌కు తీసుకెళ్లి, అతని నుంచి వివరాలు తెలుసుకున్నారు. అనంతరం బాలుడి తల్లిదండ్రులను సంప్రదించి, అతడిని సురక్షితంగా ఇంటికి చేర్చారు. "బాధ్యతారాహిత్యంగా ప్రవర్తించిన తల్లిదండ్రులిద్దరికీ కౌన్సెలింగ్ ఇస్తున్నాం" అని బసిర్‌హత్ జిల్లా సీనియర్ పోలీస్ అధికారి ఒకరు తెలిపారు.